கோலாலம்பூர், மே 3 –
நெகிரி செம்பிலான் மாநில அரசில் ஏற்பட்டுள்ள நிர்வாக மற்றும் அரசியல் நெருக்கடியை சமாளிக்கும் முயற்சியில் அம்னோ துணைத் தலைவரும் ரெம்பாவ் நாடாளுமன்ற உறுப்பினருமான Mohamad Hasan முக்கிய பங்காற்றி வருகிறார் என்று அம்னோ தலைவரும் துணைப் பிரதமருமான Ahmad Zahid Hamidi தெரிவித்தார்.
அம்னோவின் 80ஆம் ஆண்டு நிறைவு நிகழ்வை முன்னிட்டு நடைபெற்ற சிறப்பு நேர்காணலில் பேசிய அவர், “டோக் மாட்” என அழைக்கப்படும் மொஹமட் ஹசான், தற்போதைய பிரச்சினைக்கு தீர்வு காண கட்சித் தலைவர்களுடன் தொடர்ந்து ஆலோசனைகள் நடத்தி வருவதாக கூறினார்.
நெகிரி செம்பிலான் அரசியல் குழப்பத்தின் பின்னணியில் மொஹமட் ஹசான் இருப்பதாக சில தரப்புகள் முன்வைக்கும் குற்றச்சாட்டுகள் நியாயமற்றவை என்றும் அவர் வலியுறுத்தினார்.
“டோக் மாட் இந்த பிரச்சினையை சமாளிக்க தொடர்ந்து வழிகளைத் தேடி வருகிறார். என்னுடனும் அவர் அடிக்கடி ஆலோசனை நடத்துகிறார். ‘நூல் சிக்கி விட்டது; அதை மெதுவாக அவிழ்க்க வேண்டும்’ என்று நான் அவரிடம் கூறியுள்ளேன்,” என ஜாஹிட் குறிப்பிட்டார்.
அதேவேளை, நெகிரி செம்பிலான் மாநிலத்தில் ஆளும் ஒற்றுமை அரசாங்கத்திலிருந்து விலகி எதிர்க்கட்சியாக மாறும் எண்ணமே பாரிசான் நேஷனலுக்கு இல்லை என்றும் அவர் தெளிவுபடுத்தினார்.
“14 சட்டமன்ற உறுப்பினர்கள் எடுத்த முடிவு ஒற்றுமை அரசாங்கத்துடன் தொடர்வதே. எதிர்க்கட்சியாக மாறுவது குறித்து எந்த விவாதமும் நடைபெறவில்லை,” என்றார்.
முதல்வர் நியமனம் தொடர்பாக சில அதிருப்திகள் இருந்திருக்கலாம் என்றாலும், அதை விரிவான அரசியல் சூழலில் புரிந்துகொள்ள வேண்டும் என்றும் ஜாஹிட் கூறினார்.
மாநில முதல்வர் நியமனம் என்பது அம்னோ மட்டும் தீர்மானிக்கும் விஷயம் அல்ல; ஒற்றுமை அரசாங்க கூட்டணியில் உள்ள Pakatan Harapan உள்ளிட்ட கூட்டணி கட்சிகளின் ஒப்புதலும் அவசியம் என அவர் தெரிவித்தார்.
இதற்கு முன்பு, பாரிசான் நேஷனலைச் சேர்ந்த 14 சட்டமன்ற உறுப்பினர்கள், மாநில முதல்வரான Aminuddin Harun தலைமையிலான அரசுக்கு அளித்த ஆதரவை வாபஸ் பெற்றதாக தகவல்கள் வெளியாகி அரசியல் பரபரப்பு ஏற்பட்டது.
ஆனால், கடந்த வியாழக்கிழமை அனைத்து சட்டமன்ற உறுப்பினர்களும் மாநில ஒற்றுமை அரசாங்கத்திற்கு தொடர்ந்து ஆதரவு வழங்க ஒப்புக்கொண்டதாக ஜாஹிட் அறிவித்தார்.
இதனிடையே, பிரதமர் Anwar Ibrahim, யாங் டி-பெர்துவான் பெசார் Tuanku Muhriz Tuanku Munawir அவர்களின் சம்மதத்துடன் அமினுடின் ஹருன் தொடர்ந்து நெகிரி செம்பிலான் மந்திரி பெசாராக பணியாற்றுவார் என்று கடந்த செவ்வாய்க்கிழமை தெரிவித்திருந்தார்.
நெகிரி செம்பிலான் அரசியல் நிலைமை தற்போது சீராகும் திசையில் நகர்ந்து வருவதாக அரசியல் வட்டாரங்கள் கருதுகின்றன.
