தேதி: 05 மே 2026 | சென்னை
தமிழக அரசியல் வட்டாரத்தில் பெரும் அதிர்வலைகளை ஏற்படுத்தியுள்ள சட்டப்பேரவை தேர்தல் முடிவுகளைத் தொடர்ந்து, திமுக உட்பகை வெளிப்படையாக வெடித்துள்ளது. திமுக தலைவர் மு.க. ஸ்டாலின் தனது சொந்தத் தொகுதியான கொளத்தூரில் எதிர்பாராத தோல்வியை சந்தித்த நிலையில், அதற்கான காரணம் குறித்து கட்சிக்குள் குற்றச்சாட்டுகள் எழ ஆரம்பித்துள்ளன.
இந்த நிலையில், எழும்பூர் தொகுதியின் திமுக முன்னாள் எம்எல்ஏ ஐ. பரந்தாமன், அமைச்சர் சேகர் பாபு மீது நேரடி குற்றச்சாட்டை முன்வைத்து பரபரப்பை ஏற்படுத்தியுள்ளார். அவர் வெளியிட்டுள்ள அறிக்கையில், ஸ்டாலின் தோல்விக்குக் காரணம் சேகர் பாபுவே எனத் திறந்தவெளியில் கூறியுள்ளார்.
2026ஆம் ஆண்டுக்கான தமிழக சட்டப்பேரவை தேர்தலில் மொத்தம் 234 தொகுதிகளுக்கான முடிவுகள் வெளியாகியுள்ளன. அதில், நடிகர் விஜய் தலைமையிலான தமிழக வெற்றிக் கழகம் (தவெக) முதல் முறையாகவே 108 இடங்களில் வெற்றி பெற்று மிகப்பெரிய அரசியல் சக்தியாக உருவெடுத்துள்ளது. இதனால், ஆளும் திமுக கூட்டணி 73 இடங்களுக்குச் சுருங்கி ஆட்சியை இழந்துள்ளது.
முதல்வராக இருந்த மு.க. ஸ்டாலின் தன்னுடைய சொந்தத் தொகுதியில் தோல்வியடைந்ததோடு, பல முக்கிய அமைச்சர்கள் மற்றும் மூத்த தலைவர்களும் தோல்வியை சந்தித்துள்ளனர். இந்த சூழலில், ஸ்டாலின் தனது முதல்வர் பதவியை ராஜிநாமா செய்திருப்பதும் அரசியல் சூழலை மேலும் தீவிரப்படுத்தியுள்ளது.
இந்நிலையில், பரந்தாமன் தனது அறிக்கையில்,
“தமிழக முழுவதும் தேர்தல் பிரச்சாரம் மேற்கொண்ட தலைவரின் சொந்தத் தொகுதியை முறையாக கவனிக்காதது மிகப்பெரிய தவறு. இதற்குப் பொறுப்பானவர்கள்மீது கட்சித் தலைமையகம் தயவு தாட்சண்யமின்றி நடவடிக்கை எடுக்க வேண்டும்,” என்று வலியுறுத்தியுள்ளார்.
மேலும், “தலைவரின் தோல்விக்கு காரணமானவர் எந்த வெட்கமும் இன்றி மீண்டும் தலைவர் முன்னிலையில் நிற்பது ஏற்றுக்கொள்ள முடியாதது. ‘நான் பார்த்துக்கொள்கிறேன்’ என்ற உறுதி இதற்காகத்தானா?” என்று கேள்வி எழுப்பியுள்ளார்.
இந்த குற்றச்சாட்டு திமுகவின் உள்நிலை அரசியலில் புதிய பதற்றத்தை ஏற்படுத்தியுள்ளது. கட்சித் தலைமையகம் இதற்கு எவ்வாறு பதிலளிக்கிறது என்பதும், சேகர் பாபு மீது ஏதேனும் நடவடிக்கை எடுக்கப்படுமா என்பதும் அடுத்த கட்ட அரசியல் விவாதமாக மாறியுள்ளது.
அதேவேளை, தேர்தல் தோல்வியின் காரணங்களை ஆராய திமுக தலைமையகம் விரைவில் ஆலோசனை கூட்டம் நடத்தும் எனக் கட்சிவட்டாரங்கள் தெரிவித்துள்ளன. தமிழக அரசியலில் புதிய மாற்றங்கள் உருவாகும் முன்னோட்டமாக இந்தச் சம்பவம் பார்க்கப்படுகிறது.
