புத்ராஜெயா | 11 ஆகஸ்ட் 2026
மலேசியாவின் முன்னாள் பிரதமர் துன் டாக்டர் மகாதீர் முகமட் மற்றும் அவரது துணைவியார் துன் டாக்டர் சித்தி ஹஸ்மா முகமட் அலி ஆகியோர், ஆசிய அளவில் முக்கியத்துவம் வாய்ந்த மூன்று வரலாற்றுச் சாதனைப் பதிவுகளைப் பெற்றுள்ளனர்.
101 வயதான துன் டாக்டர் மகாதீரும், 100 வயதான துன் டாக்டர் சித்தி ஹஸ்மாவும் தொடர்புடைய இந்த சாதனைப் பதிவுகள், புத்ராஜெயாவில் உள்ள பெர்டானா லீடர்ஷிப் ஃபவுண்டேஷனில் நடைபெற்ற சிறப்பு நிகழ்வில் அதிகாரப்பூர்வமாக வழங்கப்பட்டன.
ASEAN Records சார்பில் துன் டாக்டர் மகாதீர், “உயிருடன் இருக்கும் வயதில் மூத்த முன்னாள் பிரதமர்” என்ற சாதனையையும், துன் டாக்டர் சித்தி ஹஸ்மா, “உயிருடன் இருக்கும் வயதில் மூத்த முன்னாள் பிரதமரின் துணைவியார்” என்ற சாதனையையும் பெற்றனர்.
இதனுடன், ASIA Records சார்பில் இருவருக்கும் இணைந்து வழங்கப்பட்ட மூன்றாவது சாதனைப் பதிவு, “உயிருடன் இருக்கும் இரு நூற்றாண்டு வயது கொண்ட முன்னாள் அரசுத் தலைவர் மற்றும் அவரது துணைவியார்” என்ற வரலாற்றுச் சிறப்புமிக்க அங்கீகாரத்தைப் பதிவு செய்துள்ளது.
இந்த மூன்று சாதனைகளும் ஒரே காலகட்டத்தில் நிகழ்ந்த பல முக்கியமான குடும்ப மைல்கற்களுடன் இணைந்துள்ளன. துன் டாக்டர் மகாதீர் தனது 101ஆவது பிறந்தநாளை ஜூலை 10ஆம் தேதியும், துன் டாக்டர் சித்தி ஹஸ்மா தனது 100ஆவது பிறந்தநாளை ஜூலை 12ஆம் தேதியும் கொண்டாடினர்.
மேலும், இத்தம்பதியினர் கடந்த ஆகஸ்ட் 5ஆம் தேதி தங்களது 70ஆவது திருமண ஆண்டு விழாவையும் கொண்டாடினர்.
சாதனைப் பதிவுகளை உறுதிப்படுத்திய அதிகாரப்பூர்வ ஆய்வுக் குழு, ASEAN பிராந்தியத்திலும் ஆசியாவின் முக்கிய சந்தைகளிலும் இதற்கு இணையான சாதனை பொதுவாகப் பதிவு செய்யப்பட்டதாகத் தெரியவில்லை என்பதை உறுதிப்படுத்தியுள்ளது.
சாதனைச் சான்றிதழ்களை ASEAN Records மற்றும் ASIA Records ஆலோசனைக் குழுத் தலைவர் யங் பஹோர்மத் தன்ஸ்ரீ டத்தோக் டேனி ஓய் வழங்கினார். அவருடன் தலைமைச் சாதனைத் தீர்ப்பாளர்களான திருமதி கில்லியன் ஓய் மற்றும் திரு. எல்ட்ரிக் கோ ஆகியோரும் கலந்து கொண்டனர்.
மலேசிய அரசியல் வரலாற்றில் நீண்டகாலம் முக்கிய பங்காற்றிய துன் டாக்டர் மகாதீர் மற்றும் சமூக, மருத்துவத் துறைகளில் தனித்துவமான பங்களிப்புகளைச் செய்த துன் டாக்டர் சித்தி ஹஸ்மா ஆகியோரின் நீண்ட ஆயுளையும், 70 ஆண்டுகால திருமண வாழ்க்கையையும் கௌரவிக்கும் வகையில் இந்த சாதனைப் பதிவுகள் அமைந்துள்ளன.
100 ஆண்டுகளைக் கடந்த இருவரும் இணைந்து வாழ்ந்து வருவதுடன், முன்னாள் பிரதமர் மற்றும் அவரது துணைவியார் இருவரும் உயிருடன் இருக்கும் நூற்றாண்டு வயதினராக அங்கீகரிக்கப்படுவது ஆசிய அளவில் குறிப்பிடத்தக்க வரலாற்றுச் சாதனையாகப் பார்க்கப்படுகிறது.
செய்தியாளர்:
நான் ஒரு மலேசியன் (NOM) / MKU Malaysia Kalai Ulagam
12 ஆகஸ்ட் 2026
