சிரம்பான் | ஜூலை 29
நெகிரி செம்பிலான் மாநிலத் தேர்தல் வாக்குப்பதிவு வரும் சனிக்கிழமை நடைபெறவுள்ள நிலையில், பக்காத்தான் ஹராப்பான் (PH) கூட்டணியின் தேர்தல் பிரச்சாரத்தை மேலும் தீவிரப்படுத்தும் நோக்கில் பிரதமரும் பக்காத்தான் ஹராப்பான் தலைவருமான டத்தோஸ்ரீ அன்வார் இப்ராஹிம் இன்று நெகிரி செம்பிலானில் பல்வேறு நிகழ்ச்சிகளில் பங்கேற்கிறார்.
இன்றைய தேர்தல் சுற்றுப்பயணத்தை ஜெலுபு நாடாளுமன்றத் தொகுதிக்குட்பட்ட சென்னா சட்டமன்றத் தொகுதியில் நடைபெறும் பொதுமக்களுடனான தேநீர் சந்திப்பு நிகழ்ச்சியுடன் அவர் தொடங்குகிறார். அதனைத் தொடர்ந்து, பரோயில் உள்ள இஸ்லாமிய தஃவா மைய மண்டபத்தில் நடைபெறும் “தேமு அன்வார்” (Temu Anwar) நிகழ்ச்சியில் கலந்து கொண்டு மக்களுடன் நேரடியாக உரையாடவுள்ளார்.
மாலை வேளையில், சிரம்பானில் அமைந்துள்ள கிளானா ரிசார்ட்டில் இந்திய சமூகத்தினருடன் நடைபெறும் இரவு விருந்து நிகழ்ச்சியிலும் பிரதமர் பங்கேற்று உரையாற்றவுள்ளார்.
அதனைத் தொடர்ந்து, மாநிலத் தேர்தல் பிரச்சாரத்தின் இறுதிக்கட்டத்தை குறிக்கும் “கேகால் ஹராப்பான் நெகிரி செம்பிலான்” (Kekal Harapan Negeri Sembilan) மாபெரும் நிறைவு பொதுக்கூட்டங்களில் பிரதமர் அன்வார் தலைமையேற்கிறார்.
இரவு 9.00 மணிக்கு சிரம்பானிலுள்ள பெட்டாரியா வர்த்தக மையத்தில் முதல் பொதுக்கூட்டமும், பின்னர் இரவு 10.30 மணிக்கு நிலாயில் உள்ள தேசா செம்பாக்கா இரவுச் சந்தை திடலில் இரண்டாவது பொதுக்கூட்டமும் நடைபெறவுள்ளது.
இந்த நிகழ்ச்சிகளில் நெகிரி செம்பிலான் மந்திரி புசார் டத்தோஸ்ரீ அமினுடின் ஹாருன், டிஏபி பொதுச்செயலாளர் அந்தோணி லோக் சியூ ஃபூக், அமனா தலைவர் டத்தோஸ்ரீ முகமட் சாபு, பிகேஆர் துணைத் தலைவர் டத்தோஸ்ரீ அமிருடின் ஷாரி, பக்காத்தான் ஹராப்பான் தகவல் தொடர்பு இயக்குநரும் பிகேஆர் தகவல் பிரிவுத் தலைவருமான டத்தோஸ்ரீ ஃபஹ்மி ஃபட்சில் உள்ளிட்ட கூட்டணியின் முக்கிய தலைவர்களும் மாநிலத் தேர்தலில் போட்டியிடும் வேட்பாளர்களும் கலந்துகொள்வார்கள் என எதிர்பார்க்கப்படுகிறது.
பிரச்சாரம் வரும் வெள்ளிக்கிழமை இரவு 11.59 மணியுடன் நிறைவடையவுள்ள நிலையில், பிரதமரின் இந்த தீவிர தேர்தல் சுற்றுப்பயணம் பக்காத்தான் ஹராப்பான் கூட்டணியின் பிரச்சாரத்திற்கு கூடுதல் வலுசேர்க்கும் என அரசியல் வட்டாரங்கள் கருதுகின்றன.
16ஆவது நெகிரி செம்பிலான் மாநிலத் தேர்தலில் பக்காத்தான் ஹராப்பான் அனைத்து 36 சட்டமன்றத் தொகுதிகளிலும் போட்டியிடுகிறது. இதில் பிகேஆர் சார்பில் 16 பேரும், டிஏபி சார்பில் 11 பேரும், அமனா சார்பில் 9 பேரும் களமிறக்கப்பட்டுள்ளனர்.
மொத்தம் 36 சட்டமன்றத் தொகுதிகளுக்காக 103 வேட்பாளர்கள் போட்டியிடுகின்றனர். சுமார் 8,67,151 சாதாரண வாக்காளர்கள் வரும் சனிக்கிழமை தங்களது ஜனநாயக உரிமையைப் பயன்படுத்தி வாக்களிக்கவுள்ளனர்.
