27 மே 2026 | அம்பாங்
பார்லிமென் பாண்டன் ‘அரசியல் ஜாம்பவானை’ எதிர்கொள்ள தயார் – தெங்கு ஸஃப்ருல்
அடுத்த பொதுத் தேர்தலில் பந்தான் நாடாளுமன்றத் தொகுதியில் போட்டியிடும் வாய்ப்பு கிடைத்தால், முன்னாள் பொருளாதார அமைச்சர் Tengku Zafrul Tengku Abdul Aziz, “அரசியல் ஜாம்பவான்” என வர்ணித்த Rafizi Ramliயை எதிர்கொள்ளத் தயார் என தெரிவித்துள்ளார்.
பிரதமரின் மூத்த அரசியல் ஆலோசகராக இருக்கும் தெங்கு ஸஃப்ருல், பெரிய அரசியல் தலைவர்களை எதிர்கொள்வது தமக்கு தடையாக இல்லை என்றும், மக்கள் சேவையே முக்கியம் என்றும் வலியுறுத்தினார்.
“ரஃபிசி உண்மையிலேயே இங்கு போட்டியிடப் போகிறார் என்றால், நான் ஒரு பெரிய அரசியல் சக்தியை எதிர்கொள்ள வேண்டியிருக்கும். ஆனால் அது முக்கிய விஷயம் அல்ல.
“எங்களுக்கு வழங்கப்படும் எந்தப் பகுதியாக இருந்தாலும் – அது பந்தான், அம்பாங் அல்லது வேறு இடமாயினும் – மக்களுக்கு சேவை செய்வதே எங்களின் கடமை,” என்று அவர் கூறினார்.
அவர் இந்த கருத்துகளை அம்பாஙில் நடைபெற்ற AMK பந்தான் அமைப்பின் ‘கொர்பான் பெர்டானா’ நிகழ்ச்சிக்குப் பிறகு செய்தியாளர்களிடம் தெரிவித்தார்.
இந்த நிகழ்வில் செலாங்கூர் மாநில உள்கட்டமைப்பு மற்றும் வேளாண்மை நிர்வாக சபை உறுப்பினரும் பந்தான் இந்தா சட்டமன்ற உறுப்பினருமான Izham Hashim மற்றும் AMK பந்தான் தலைவர் மொஹ்ட் இஃவாத் அமீர் ஹமிருடின் உள்ளிட்டோர் கலந்துகொண்டனர்.
ரஃபிசி ரம்லி கடந்த மே 17ஆம் தேதி PKR கட்சியிலிருந்தும், நாடாளுமன்ற உறுப்பினர் பதவியிலிருந்தும் விலகியதைத் தொடர்ந்து, பந்தான் தொகுதியில் தெங்கு ஸஃப்ருல் போட்டியிடலாம் என்ற அரசியல் ஊகங்கள் எழுந்துள்ளன.
இதுகுறித்து அவர் கூறுகையில், தற்போது நாடாளுமன்ற உறுப்பினர் இல்லாத பந்தான் தொகுதியை கண்காணித்து ஒருங்கிணைக்கும் பொறுப்பை பிரதமர் தமக்கு வழங்கியுள்ளதாக தெரிவித்தார்.
“முன்பே பந்தான் இந்தா மற்றும் பந்தாய் சட்டமன்ற அலுவலகங்களுடன் இணைந்து பணியாற்றி வந்தோம். தற்போது இளைஞர்கள், பெண்கள் அமைப்புகள், உள்ளூர் அரசு சாரா அமைப்புகள், MPAJ மற்றும் அரசாங்க நிறுவனங்களுடன் இணைந்து மக்களுக்கான சேவைகளை தொடரும் பணியில் ஈடுபட்டுள்ளோம்,” என்றார்.
மேலும், கூட்டாட்சி அரசாங்கம் மற்றும் மாநில நிர்வாகம் இணைந்து மக்கள் நல சேவைகளை தொடர்ந்து முன்னெடுக்கும் என்றும் அவர் உறுதியளித்தார்.
தற்போது மேற்கொள்ளப்படும் பணிகள் தேர்தல் முன்னேற்பாடுகளுக்காக மட்டும் அல்லாது, மக்களுக்கு இடையறாத சேவையை வழங்குவதற்கான முயற்சியாகும் என்றும் தெங்கு ஸஃப்ருல் குறிப்பிட்டார்.
