அலோர் ஸ்டார், 27 பிப்ரவரி
Bukit Kayu Hitam பகுதியில் மலேசிய எல்லைக் கட்டுப்பாடு மற்றும் பாதுகாப்பு நிறுவன (MCBA) கமாண்டரின் வாகனத்தை குறிவைத்து நடத்தப்பட்ட துப்பாக்கிச் சூடு சம்பவத்துடன் தொடர்புடையதாக சந்தேகிக்கப்படும் தாய்லாந்து பெண் ஒருவர் உட்பட மொத்தம் ஏழு பேர் கைது செய்யப்பட்டுள்ளனர்.
இந்த சம்பவம் கடந்த புதன்கிழமை காலை இடம்பெற்றதாகத் தெரிவிக்கப்படுகிறது. சம்பவத்தையடுத்து உடனடியாக விசாரணை தீவிரப்படுத்தப்பட்டதுடன், Bukit Kayu Hitam மற்றும் Padang Besar ஆகிய எல்லைப்பகுதிகளில் ஒருங்கிணைந்த சோதனை நடவடிக்கைகள் முன்னெடுக்கப்பட்டன.
காலை 10.30 மணி முதல் மாலை 6 மணி வரை மேற்கொள்ளப்பட்ட விசாரணை மற்றும் சோதனைகளின் மூலம் 22 முதல் 52 வயதுக்குட்பட்ட ஆறு ஆண்களும், சந்தேக நபர்களில் ஒருவரின் மனைவியான 30 வயதுடைய தாய்லாந்து பெண்ணும் கைது செய்யப்பட்டதாக கெடா மாநில போலீஸ் தலைவர் Adzli Abu Shah தெரிவித்தார்.
இன்று வெள்ளிக்கிழமை Kedah Police Headquarters-இல் நடைபெற்ற செய்தியாளர் சந்திப்பில் அவர் கூறியதாவது, கைது செய்யப்பட்டவர்கள் அனைவரும் சம்பவம் நடந்த இடத்திற்கு அருகில் வசித்து வந்ததுடன், ஒருவருக்கொருவர் அறிமுகமானவர்கள் என்பதும் ஆரம்ப விசாரணையில் உறுதி செய்யப்பட்டுள்ளது.
மேலும், கைது செய்யப்பட்ட நபர்களில் நால்வருக்கு முன்பே கடுமையான குற்றச்சாட்டுகள் பதிவு செய்யப்பட்டிருந்ததாகவும், குற்றப் பின்னணி குறித்து போலீசார் விரிவான ஆய்வை மேற்கொண்டு வருவதாகவும் அவர் தெரிவித்தார். சம்பவத்தில் பயன்படுத்தப்பட்டதாக சந்தேகிக்கப்படும் ஆயுதங்களை மீட்கும் பணியும் நடைபெற்று வருகிறது.
மேல் விசாரணைக்காக ஆறு ஆண் சந்தேக நபர்கள் இரு முதல் நான்கு நாட்கள் வரை தடுப்புக் காவலில் வைக்கப்பட்டுள்ள நிலையில், 30 வயதுடைய பெண் 14 நாட்கள் தடுப்புக் காவலில் வைக்கப்பட்டுள்ளார். துப்பாக்கிச் சூட்டின் நோக்கம், சம்பவத்துக்குப் பின்னுள்ள சதி மற்றும் இதற்கு பின்னால் செயல்பட்டிருக்கக்கூடிய குழுக்கள் குறித்து தீவிரமாக விசாரணை நடைபெற்று வருகிறது.
எல்லைப் பாதுகாப்பு அதிகாரிகள் மீது நடத்தப்பட்ட தாக்குதல் சம்பவம் மாநிலத்தில் பெரும் அதிர்வை ஏற்படுத்தியுள்ளது. எல்லைப் பாதுகாப்பு நடவடிக்கைகள் மேலும் வலுப்படுத்தப்பட்டுள்ளதுடன், பொதுமக்கள் அமைதியை காக்கவும், சந்தேகத்துக்கிடமான நடவடிக்கைகள் குறித்த தகவல்களை உடனடியாக அதிகாரிகளுக்கு அறிவிக்கவும் போலீசார் கேட்டுக்கொண்டுள்ளனர்.
இந்த வழக்கு தொடர்பான மேலதிக தகவல்கள் விசாரணை முன்னேற்றத்துக்கு அமைவாக வெளியிடப்படும் என போலீசார் தெரிவித்துள்ளனர்.
