கோலாலம்பூர், 9 செப்டம்பர் 2026:
இந்தோனேசியாவின் சுந்தா நீரிணையில் அமைந்துள்ள அனக் கிரகடாவ் எரிமலையில் ஏற்பட்டுள்ள தொடர் வெடிப்பைத் தொடர்ந்து, சல்பர் டையாக்சைடு (Sulphur Dioxide – SO₂) மற்றும் எரிமலைச் சாம்பல் மலேசிய வான்பரப்புக்குள் நுழைந்துவிட்டதாக சமூக ஊடகங்களில் பரவி வரும் தகவல் குறித்து பொதுமக்கள் அச்சமடைய வேண்டாம் என தெரிவிக்கப்பட்டுள்ளது.
மலேசிய வானிலை ஆய்வுத் துறை (MetMalaysia), அனக் கிரகடாவிலிருந்து வெளியாகும் பொருட்கள் தற்போது மலேசியாவை நோக்கி நகரவில்லை என தெளிவுபடுத்தியுள்ளது.
வைரலாகப் பரவி வரும் சில படங்கள் மற்றும் வரைபடங்கள் உண்மையான நிலவரத்தை பிரதிபலிப்பவை அல்ல என்றும், அவை கணினி மாதிரிகளின் அடிப்படையில் உருவாக்கப்பட்ட காட்சிப்படுத்தல்கள் மட்டுமே என்றும் MetMalaysia தெரிவித்துள்ளது. தற்போதைய காற்றின் திசை மற்றும் வேகத்தின் அடிப்படையில், எரிமலைச் சாம்பலின் பெரும்பகுதி சுந்தா நீரிணை மற்றும் இந்தோனேசியாவைச் சுற்றியுள்ள பகுதிகளிலேயே காணப்படுவதாக தெரிவிக்கப்பட்டுள்ளது.
இருப்பினும், காற்றின் திசை மற்றும் வேகத்தில் ஏற்படும் மாற்றங்கள் அல்லது அனக் கிரகடாவ் பகுதியில் மேலும் வலுவான எரிமலை வெடிப்புகள் ஏற்பட்டால், சாம்பலின் நகர்வு மாறக்கூடும் என்பதால் நிலைமை தொடர்ந்து கண்காணிக்கப்பட்டு வருகிறது.
அனக் கிரகடாவ் எரிமலை கடந்த சில நாட்களாக தொடர்ந்து செயல்பட்டு வருகிறது. செப்டம்பர் 4ஆம் தேதி இரவு தொடங்கிய ஒரு தொடர் வெடிப்பு சுமார் 25 மணி நேரம் நீடித்ததாக இந்தோனேசிய புவியியல் மற்றும் எரிமலை கண்காணிப்பு அதிகாரிகள் தெரிவித்துள்ளனர். எரிமலை தற்போது Level III – Siaga என்ற எச்சரிக்கை நிலையில் உள்ளது.
இந்த வெடிப்பின் காரணமாக இந்தோனேசியாவில் விமானப் போக்குவரத்தும் குறிப்பிடத்தக்க அளவில் பாதிக்கப்பட்டது. எரிமலைச் சாம்பல் காரணமாக பல விமான நிலையங்கள் தற்காலிகமாக மூடப்பட்டதுடன், ஆயிரக்கணக்கான விமான சேவைகள் ரத்து அல்லது தாமதத்திற்கு உள்ளாகின. மலேசியாவிலிருந்தும் ஜகார்த்தாவுக்குச் செல்லும் பல விமானங்கள் பாதிக்கப்பட்டன.
சுகாதாரப் பாதுகாப்பு குறித்து கவனம்
எரிமலைச் சாம்பலில் மிக நுண்ணிய கனிமத் துகள்கள் இருக்கக்கூடும். குறிப்பாக சில எரிமலைச் சாம்பல் துகள்களில் சிலிக்கா (Silica – Silicon Dioxide, SiO₂) காணப்படலாம். இத்தகைய நுண்துகள்கள் அதிக அளவில் காற்றில் கலந்தால், அவற்றை நீண்ட நேரம் சுவாசிப்பது கண்கள் மற்றும் சுவாசக் குழாய்களுக்கு எரிச்சலை ஏற்படுத்தக்கூடும்.
எனவே, எரிமலைச் சாம்பல் உண்மையில் தங்கள் பகுதியில் இருப்பதாக அதிகாரப்பூர்வமாக அறிவிக்கப்பட்டால், பொதுமக்கள் தேவையற்ற வெளிப்புறச் செயல்பாடுகளைத் தவிர்ப்பதும், அதிகாரிகள் வழங்கும் சுகாதார ஆலோசனைகளைப் பின்பற்றுவதும் அவசியமாகும்.
“மாஸ்க் அணியுங்கள்” என்ற சமூக ஊடகப் பதிவுகளை மட்டும் அடிப்படையாகக் கொண்டு அச்சமடைவதைத் தவிர்த்து, MetMalaysia, சுகாதார அமைச்சு மற்றும் தொடர்புடைய அதிகாரிகளின் அதிகாரப்பூர்வ அறிவிப்புகளை மட்டுமே பொதுமக்கள் பின்பற்ற வேண்டும்.
தற்போதைய நிலவரப்படி, அனக் கிரகடாவிலிருந்து மலேசியாவை நோக்கி எரிமலைச் சாம்பல் அல்லது சல்பர் டையாக்சைடு நகர்ந்து வருவதாக உறுதிப்படுத்தப்பட்ட தகவல் இல்லை.
நிலைமை தொடர்ந்து கண்காணிக்கப்பட்டு வருவதால், பொதுமக்கள் விழிப்புடன் இருப்பதுடன், உறுதிப்படுத்தப்படாத தகவல்களை சமூக ஊடகங்களில் பகிர்வதைத் தவிர்க்குமாறு கேட்டுக்கொள்ளப்படுகின்றனர்.
செய்தி:
NAAN ORU MALAYSIAN ONLINE MEDIA
