கோலாலம்பூர், செப். 7
மக்களின் முழுமையான சுகாதார நலனை உறுதி செய்வதன் மூலம், உண்மையான சுதந்திரத்தின் அர்த்தத்தை சமூக மட்டத்தில் கொண்டு சேர்க்கும் நோக்கில் ஏற்பாடு செய்யப்பட்ட “Kem Kesihatan Merdeka 2026” சுகாதார முகாம் வெற்றிகரமாக நடைபெற்றது.
காலை 10.00 மணி முதல் மாலை 4.00 மணி வரை நடைபெற்ற இம்முகாமில் சுமார் 250 பேர் கலந்துகொண்டு பல்வேறு இலவச சுகாதார சேவைகளைப் பெற்றனர்.
முகாமில் பொதுவான சுகாதாரப் பரிசோதனை, கண் பரிசோதனை, இரத்தச் சர்க்கரை பரிசோதனை, BMI அளவீடு, ஊட்டச்சத்து ஆலோசனை, சுகாதார விழிப்புணர்வு உரைகள், முதலுதவி குறித்த விழிப்புணர்வு, CPR செய்முறை விளக்கம் மற்றும் பயிற்சி உள்ளிட்ட பல்வேறு நடவடிக்கைகள் இடம்பெற்றன. குழந்தைகளுக்காகவும் சிறப்பு நடவடிக்கைகள் ஏற்பாடு செய்யப்பட்டிருந்தன.
இதனிடையே, முகாமில் கலந்துகொண்டவர்களில் சுமார் 112 பேர் PeKa B40 திட்டத்தின் கீழ் தகுதி பெற்றிருப்பது கண்டறியப்பட்டதுடன், 55 பேருக்கு கண் பரிசோதனையும் மேற்கொள்ளப்பட்டது.
மலேசியாவின் 69ஆவது தேசிய தினக் கொண்டாட்டங்களின் ஒரு பகுதியாக, முகாமிற்கு வருகை தந்த பொதுமக்களுக்கு Jalur Gemilang தேசியக் கொடிகளும் வழங்கப்பட்டன. இது நாட்டுப்பற்று, தேசிய ஒற்றுமை மற்றும் மலேசியா மீதான அன்பை வெளிப்படுத்தும் அடையாளமாக அமைந்தது.
முகாமின் செயலாளர் Subramaniam Sinnathamby கூறுகையில், சமூகத்தின் சுகாதார நலனுக்காக பல்வேறு அமைப்புகள் ஒரே நோக்கத்தின் கீழ் ஒன்றிணைந்து செயல்பட்டது பெரும் மகிழ்ச்சியளிப்பதாக தெரிவித்தார்.
மேலும், MIC Bukit Gasing கிளையின் தலைவர் Dato’ Geethanjali G, பல்வேறு அமைப்புகளையும் தொடர்புடைய தரப்பினரையும் ஒன்றிணைத்து, இம்முகாம் சிறப்பாக நடைபெறுவதற்கான முக்கிய ஒருங்கிணைப்புப் பணிகளை முன்னெடுத்ததற்காக அவர் சிறப்பு பாராட்டைப் பெற்றார்.
இந்த சுகாதார முகாம் MIC Bukit Gasing கிளை, Rotary Club of Bukit Jalil Kuala Lumpur, Sayangi Mata / Rotary District 3300 Action Group on Blindness Prevention, SV Care Group, PeKa B40, St John Ambulance Southern Zone மற்றும் Pearl Point Shopping Mall ஆகியவற்றின் ஒத்துழைப்புடன் முன்னெடுக்கப்பட்டது.
மேலும், Capt. Datuk Rajeswaran, Dr. Shyam Prasad, Prof. Dr. Vickneswaran மற்றும் Prof. Dr. Chandramathi Samudi உள்ளிட்ட சிறப்பு விருந்தினர்களும் நிகழ்வில் கலந்து கொண்டு ஆதரவு வழங்கினர்.
“பல்வேறு அமைப்புகள் மற்றும் சமூகத் தலைவர்கள் ஒன்றிணைந்து செயல்பட்டால், சமூகத்தின் பல்வேறு தரப்பினருக்கும் இன்னும் அதிகமான நன்மைகளை கொண்டு சேர்க்க முடியும். இம்முகாம் ஆரோக்கியமான, விழிப்புணர்வுமிக்க மற்றும் நலன்பேணும் சமூகத்தை உருவாக்குவதற்கான ஒரு சிறிய ஆனால் அர்த்தமுள்ள முன்னெடுப்பாக அமையும்,” என Subramaniam Sinnathamby தெரிவித்தார்.
மெர்டேகா கொண்டாட்டத்தை சுகாதார விழிப்புணர்வுடன் இணைத்து நடத்தப்பட்ட இம்முகாம், “சுதந்திரம் என்பது நாட்டின் விடுதலை மட்டுமல்ல; ஒவ்வொரு குடிமகனும் ஆரோக்கியமாகவும் நலமாகவும் வாழ்வதற்கான உரிமையையும் உள்ளடக்கியது” என்ற முக்கியமான செய்தியை சமூகத்திற்கு எடுத்துச் சென்றது.
