சென்னை | ஏப்ரல் 10, 2026
தமிழ் திரையுலகில் பெரும் சர்ச்சையை ஏற்படுத்தியுள்ள ‘ஜனநாயகன்’ திரைப்படத்தின் ஆன்லைன் லீக் சம்பவம் குறித்து பல்வேறு தரப்பிலிருந்து கண்டனங்கள் எழுந்து வருகின்றன. நடிகர் சூர்யா, தனது நண்பரும் நடிகருமான விஜய்க்கு ஆதரவாக சமூக வலைதளத்தில் உணர்ச்சிகரமான பதிவை வெளியிட்டுள்ளார்.
பல ஆண்டுகளாக நடைபெற்ற உழைப்பு, நூற்றுக்கணக்கான தொழிலாளர்களின் பங்களிப்பு, மேலும் கோடிக்கணக்கான முதலீட்டுடன் தயாரிக்கப்பட்ட ‘ஜனநாயகன்’ திரைப்படம், வெளியீட்டிற்கு முன்பே இணையத்தில் கசிந்திருப்பது திரையுலகை அதிர்ச்சியில் ஆழ்த்தியுள்ளது. குறிப்பாக, எடிட்டிங் வெர்சன் HD தரத்தில் வெளியாகியிருப்பது படக்குழுவினருக்கு பெரும் இழப்பாக கருதப்படுகிறது.
இந்த நிலையில், சூர்யா தனது பதிவில், “இது இதயத்தை நொறுக்குவதாகவும் மிகப்பெரிய அநீதியாகவும் உள்ளது. ஒரு முழு குழுவின் உழைப்பும் இவ்வாறு வீணாகிவிட்டது மிகவும் வேதனை அளிக்கிறது. தயவுசெய்து இந்தப் படத்தை பார்க்கவோ, பகிரவோ வேண்டாம். படக்குழுவின் உழைப்பை மதியுங்கள். இது மன்னிக்க முடியாத செயல்,” என்று தெரிவித்துள்ளார்.
திரைப்படத் துறையினர், ரசிகர்கள் மற்றும் சமூக வலைதள பயனர்கள் பலரும் இந்த சம்பவத்தை கடுமையாக விமர்சித்து வருகின்றனர். குறிப்பாக, திருட்டுத்தனமாக படங்களை பார்ப்பது படைப்பாளிகளின் உழைப்பை பறிக்கும் செயல் எனவும் அவர்கள் வலியுறுத்துகின்றனர்.
‘ஜனநாயகன்’ திரைப்படம் தியேட்டர்களில் அல்லது அதிகாரப்பூர்வ OTT தளங்களில் வெளியான பிறகே பார்ப்பது தான் படக்குழுவினருக்கு உரிய மரியாதை என திரையுலகினர் கோரிக்கை விடுத்துள்ளனர். இந்த சம்பவம், சினிமா துறையில் காப்புரிமை பாதுகாப்பு குறித்து மீண்டும் தீவிரமான விவாதத்தை கிளப்பியுள்ளது.
