கிள்ளான், செப். 5
சிலாங்கூர் மாநில மக்களுக்கு தரமான வேலைவாய்ப்புகளை உருவாக்கும் நோக்கில் ஏற்பாடு செய்யப்பட்ட ‘Karnival Jelajah Lindung Kerjaya Jobcare Daerah Klang’ தொழில் கண்காட்சியில் இன்று காலை கலந்துகொண்ட பாப்பரைடு, நிகழ்வின் அதிகாரப்பூர்வ தொடக்கத்தை நடைபயணமாகச் சென்று சிறப்பித்தார்.
இந்தக் கண்காட்சியில் பல்வேறு துறைகளைச் சேர்ந்த 36 முதலாளி நிறுவனங்கள் பங்கேற்று, மொத்தம் 4,258 வேலைவாய்ப்பு வாய்ப்புகளை வழங்கியுள்ளன. அவற்றில் சில பணியிடங்களில் மாதச் சம்பளம் RM12,999 வரை வழங்கப்படுவது குறிப்பிடத்தக்கதாகும்.
மேலும், வழங்கப்பட்டுள்ள மொத்த வேலைவாய்ப்புகளில் 95.99 விழுக்காடு சிலாங்கூர் மாநிலத்திலேயே நிரப்பப்படவுள்ளன. இதன் மூலம் உள்ளூர் மக்களுக்கு தங்களது வசிப்பிடத்திற்கு அருகிலேயே பொருத்தமான வேலைவாய்ப்புகளைத் தேடிக்கொள்ள சிறந்த வாய்ப்பு உருவாகியுள்ளது.
நிகழ்வின்போது பாப்பரைடு, பல்வேறு முதலாளி நிறுவனங்களின் கண்காட்சி அரங்குகளை நேரில் பார்வையிட்டதுடன், வேலை தேடும் இளைஞர்கள் மற்றும் பொதுமக்களுடன் கலந்துரையாடி, அவர்களின் வேலைவாய்ப்பு தொடர்பான தேவைகள் மற்றும் எதிர்பார்ப்புகளையும் கேட்டறிந்தார்.
அதேவேளை, பல்வேறு துறைகளில் தற்போது கிடைக்கப்பெறும் வேலைவாய்ப்புகள், சம்பள வாய்ப்புகள் மற்றும் தொழில் முன்னேற்றத்திற்கான சந்தர்ப்பங்கள் குறித்தும் அவர் நேரடியாக பார்வையிட்டார்.
இந்நிகழ்வை வெற்றிகரமாக முன்னெடுப்பதற்கு ஒத்துழைப்பு வழங்கிய பண்டமரான் சட்டமன்ற உறுப்பினர் YB டோனி லியோங் துக் சீ, MBDK மன்ற உறுப்பினர்கள், கிள்ளான் மாவட்ட இந்திய சமூகத் தலைவர், சிலாங்கூர் PERKESO இயக்குநர் முஹம்மது ரஷிட் ஒத்மான், UPEN அதிகாரிகள் மற்றும் உள்ளூர் சமூகத் தலைவர்கள் உள்ளிட்ட அனைவருக்கும் பாப்பரைடு தனது நன்றியைத் தெரிவித்தார்.
“இது வெறும் வேலைவாய்ப்பு கண்காட்சி மட்டுமல்ல. பொதுமக்கள் தங்களுக்குப் பொருத்தமான தொழிலை நேரடியாகத் தேடிக்கொள்ளவும், முதலாளிகளுடன் தொடர்பை ஏற்படுத்திக்கொள்ளவும் உதவும் முக்கியமான முயற்சியாகும்,” என அவர் குறிப்பிட்டார்.
இத்தகைய முயற்சிகள் தொடர்ந்து முன்னெடுக்கப்படுவதன் மூலம், சிலாங்கூர் மக்களுக்கு அதிகமான தரமான வேலைவாய்ப்புகள் கிடைப்பதுடன், குடும்பங்களின் வருமானம் மற்றும் வாழ்க்கைத் தரத்தை மேம்படுத்தவும் வழிவகுக்கும் என எதிர்பார்க்கப்படுகிறது.
4,258 வேலைவாய்ப்புகள்.
36 முதலாளி நிறுவனங்கள்.
சிலாங்கூர் மக்களுக்கு இன்னும் அதிகமான தொழில் வாய்ப்புகள்.
