மலேசிய திரைப்படங்களுக்கு ஆதரவளிக்க புதிய இயக்கம் – MMFC தொடக்கம் - நான் ஒரு மலேசியன் உங்களை அன்புடன் வரவேற்கிறது!

கோலாலம்பூர், 20 ஆகஸ்ட் 2026

மலேசியத் திரைப்படத் துறையின் வளர்ச்சிக்கும், உள்நாட்டு கலைஞர்கள் மற்றும் படைப்பாளிகளின் திறமைகளை ஊக்குவிப்பதற்கும் புதிய முயற்சியாக Malaysian Movie Fan Club (MMFC) அதிகாரப்பூர்வமாக அறிமுகம் செய்யப்பட்டுள்ளது.

MKU Malaysia Kalai Ulagam நிறுவனர் டாக்டர் SP பிரபா தலைமையிலான குழுவினரால் முன்னெடுக்கப்படும் இந்த முயற்சி, மலேசிய திரைப்படங்களை ரசிகர்கள் மத்தியில் மேலும் கொண்டு சேர்ப்பதுடன், உள்ளூர் திரைப்படங்கள் மற்றும் கலைஞர்களுக்கு வலுவான ஆதரவு தளத்தை உருவாக்கும் நோக்கத்தைக் கொண்டுள்ளது.

MMFC-யின் அதிகாரப்பூர்வ அறிமுக நிகழ்வு, Dancing Raja Studios நிறுவனத்தின் நிறுவனர் Dato’ Seri G அவர்களால் சிறப்பாக தொடங்கி வைக்கப்பட்டது.

இந்த நிகழ்வில் மலேசிய பொழுதுபோக்குத் துறையைச் சேர்ந்த பல முக்கிய பிரமுகர்கள் கலந்து கொண்டு MMFC-யின் புதிய முயற்சிக்கு தங்களது ஆதரவை வெளிப்படுத்தினர்.

மலேசிய மூத்த நடிகர் KS Maniam, நடிகர்கள் Vinoshan, Loga Varman, நடிகை Susila மற்றும் Dato’ Seri Josy Nathan உள்ளிட்ட திரையுலகப் பிரபலங்கள் நிகழ்வில் கலந்து கொண்டு MMFC இயக்கத்திற்கு வாழ்த்துகளையும் ஆதரவையும் தெரிவித்தனர்.

மலேசியாவில் உருவாகும் திரைப்படங்கள், கலைஞர்கள் மற்றும் தொழில்நுட்பக் கலைஞர்களுக்கு மக்கள் மத்தியில் அதிக வரவேற்பையும் ஆதரவையும் உருவாக்குவதில் திரைப்பட ரசிகர்களின் பங்களிப்பு மிகவும் முக்கியமானது என ஏற்பாட்டாளர்கள் தெரிவித்தனர்.

MMFC மூலம் திரைப்பட ரசிகர்கள், தயாரிப்பாளர்கள், இயக்குநர்கள், நடிகர்கள், நடிகைகள், தொழில்நுட்பக் கலைஞர்கள், ஊடகங்கள் மற்றும் திரைப்படத் துறை ஆதரவாளர்கள் என அனைவரையும் ஒரே தளத்தின் கீழ் ஒன்றிணைக்க திட்டமிடப்பட்டுள்ளது.

மேலும், மலேசியத் திரைப்படங்களை ஊக்குவித்தல், புதிய உள்ளூர் திறமைகளை அடையாளம் காணுதல், திரைப்பட வெளியீடுகள் மற்றும் கலை நிகழ்வுகளுக்கு ரசிகர் ஆதரவை அதிகரித்தல், உள்ளூர் படைப்புகளுக்கான விழிப்புணர்வை உருவாக்குதல் போன்ற பல்வேறு நடவடிக்கைகளை முன்னெடுக்க MMFC திட்டமிட்டுள்ளது.

“மலேசியாவில் உருவாகும் திரைப்படங்களுக்கும் நமது உள்ளூர் கலைஞர்களுக்கும் ரசிகர்களின் ஆதரவு மிகப் பெரிய பலமாக அமையும். மலேசிய திரைப்படத் துறையை வளர்ப்பதில் ரசிகர்களும் ஒரு முக்கிய அங்கமாக இருக்க வேண்டும் என்பதே MMFC-யின் பிரதான நோக்கம்,” என ஏற்பாட்டுக் குழுவினர் தெரிவித்தனர்.

மலேசிய திரைப்படங்களுக்கு மக்கள் மத்தியில் அதிக ஆதரவை உருவாக்கும் நோக்கில் ஆரம்பிக்கப்பட்டுள்ள MMFC, எதிர்காலத்தில் நாடு முழுவதும் திரைப்பட ரசிகர்களை ஒன்றிணைக்கும் ஒரு முக்கியமான இயக்கமாக வளர வேண்டும் என்பதே ஏற்பாட்டாளர்களின் எதிர்பார்ப்பாகும்.