தேதி : 10 பிப்ரவரி 2026
பினாங்
பை மதிப்பின் (Pi) நினைவாற்றலில் உலகை வியக்க வைத்த பினாங் மாணவி பூண்யமித்ரா
பினாங்கைச் சேர்ந்த 14 வயது மாணவி பூண்யமித்ரா குமாரேசன், தனது அபாரமான நினைவாற்றல் திறமையால் தேசிய மற்றும் சர்வதேச அளவில் பெரும் கவனத்தை ஈர்த்துள்ளார். பினாங்க் SMK(P) St. George மேல்நிலைப் பள்ளியில் பயிலும் இவர், சமீபத்தில் Malaysia Book of Records-இல் இடம்பிடித்து சாதனை புரிந்துள்ளார்.
2026 பிப்ரவரி 9ஆம் தேதி, “ஒரு இளம் வயதினரால் மனப்பாடமாக அதிகமான பை (Pi) இலக்கங்களை உரைத்தவர்” என்ற பிரிவில், பூண்யமித்ரா மலேசியா புத்தகச் சாதனைகளில் அதிகாரப்பூர்வமாக பதிவு செய்யப்பட்டார். அவர் எந்த எழுத்துப் பார்வையுமின்றி, பை மதிப்பின் முதல் 300 இலக்கங்களை துல்லியமாக நினைவில் கொண்டு உரைத்தது குறிப்பிடத்தக்கது.
இதற்கு முன், Malaysia Kids Got Talent – Season 9 (2025) போட்டியில், Memory Athlete பிரிவில் கலந்து கொண்டு, பை மதிப்பின் முதல் 300 இலக்கங்களை மனப்பாடமாக உரைத்து சாம்பியன் பட்டம் வென்றார்.
மேலும், ASEAN World Records நடத்திய “Rising Starz Icon 2025” என்ற நிகழ்வில், ஒரே மேடையில் 100 மாணவர்கள் பங்கேற்ற நினைவாற்றல் போட்டியில், Memory Athlete பிரிவில் பங்கேற்று முதல் ரன்னர்-அப் பட்டத்தை பெற்றார்.
சர்வதேச அளவிலும் தனது திறமையை வெளிப்படுத்திய பூண்யமித்ரா, 2026 ஜனவரி 11ஆம் தேதி, America’s Got Talent (AGT) Season 21 ஆன்லைன் ஆடிஷனின் (Preliminary Round) Virtual Open Call-இல் பங்கேற்று, பை மதிப்பின் முதல் 300 இலக்கங்களை நினைவில் கொண்டு துல்லியமாக உரைத்தார்.
பூண்யமித்ரா தனது ஆரம்பக் கல்வியை பினாங்கில் உள்ள SK(P) Methodist பள்ளியில் முடித்துள்ளார். இளம் வயதிலேயே இந்த அளவிலான நினைவாற்றல் சாதனைகளை நிகழ்த்தியிருப்பது, பெற்றோர், ஆசிரியர்கள் மற்றும் கல்வியாளர்களிடையே பெரும் பாராட்டுகளை பெற்றுள்ளது.
இந்த சாதனைகள், மலேசிய இளைஞர்களின் திறமைகளை உலக மேடையில் உயர்த்திக் காட்டும் ஒரு முக்கிய எடுத்துக்காட்டாகக் கருதப்படுகின்றன.
