புத்ராஜெயா, டிசம்பர் 18 —
டத்துக் ரமணன் ராமகிருஷ்ணன் இன்று காலை அதிகாரப்பூர்வமாக மனித வள அமைச்சர் (Menteri Sumber Manusia) ஆக தனது பணியைத் தொடங்கினார். புத்ராஜெயாவில் உள்ள பெர்கேசோ (PERKESO) கோபுரத்தில் அமைச்சுப் பொறுப்பை ஏற்றுக்கொண்டதன் மூலம், பிரதமர் யாப் டத்தோ’ஸ்ரீ அன்வார் இப்ராஹிம் அவர்களால் வழங்கப்பட்ட முக்கிய பொறுப்பையும் பொறுப்புணர்வையும் அவர் ஏற்றுள்ளார்.
பணியேற்பைத் தொடர்ந்து, மனித வள அமைச்சகம் (KESUMA) சார்ந்த உயர்மட்ட நிர்வாகத் தலைமைத்துவத்திடமிருந்து டத்துக் ரமணன் ராமகிருஷ்ணன் விரிவான விளக்க அறிக்கையை பெற்றார். இதில் அமைச்சகத்தின் நிர்வாக அமைப்பு, அதன் கீழ் செயல்படும் நிறுவனங்களின் பணிகள், நடப்பு மற்றும் எதிர்காலத்தில் செயல்படுத்தப்பட உள்ள மூலோபாயத் திட்டங்கள் உள்ளிட்டவை இடம்பெற்றன.
நாட்டின் வேலைவாய்ப்பு சந்தை நிலவரம், தொழில்துறை உறவுகள் தொடர்பான தற்போதைய சவால்கள், நடைமுறையில் உள்ள கொள்கைகள் மற்றும் முன்முயற்சிகள் ஆகியவற்றை டத்துக் ரமணன் ராமகிருஷ்ணன் கவனமாக ஆய்வு செய்தார்.
இதனைத் தொடர்ந்து, KESUMA மற்றும் கூட்டுறவு மற்றும் நுகர்வோர் விவகாரங்கள் அமைச்சகம் (KUSKOP) இடையிலான ஒத்துழைப்பை வலுப்படுத்தும் நோக்கில், KUSKOP அமைச்சர் யப் ஸ்டீவன் சிம் சீ கியோங் அவர்களுடன் சந்தித்து ஆலோசனை நடத்தினார்.
இந்த கலந்துரையாடல், தொழிலாளர்களின் நலனை பாதுகாப்பது, தொழிலாளர் நலச்சேவைகள் மேம்பாடு, வேலைவாய்ப்பாளர்களின் திறன் வளர்ச்சி, தொழில்முனைவு பயிற்சி, சிறு மற்றும் நடுத்தர நிறுவனங்கள் (PMKS) வலுப்படுத்தல், போட்டித் திறன் கொண்ட மனித வளத்தை உருவாக்கல் ஆகிய துறைகளில் கொள்கை தொடர்ச்சியையும் ஒருங்கிணைந்த செயல்பாட்டையும் உறுதி செய்வதில் முக்கியத்துவம் பெற்றதாகும். இவை அனைத்தும் மலேசியா MADANI என்ற தேசியக் காட்சிக்கேற்ப முன்னெடுக்கப்படும் என தெரிவிக்கப்பட்டது.
KESUMA அமைப்பின் அனைத்து பணியாளர்களுடனும் நெருக்கமாக இணைந்து செயல்பட்டு, ஒவ்வொரு கொள்கையும் திட்டமும் மக்களுக்கும் நாட்டுக்கும் உண்மையான பலனை அளிக்கும் வகையில் செயல்படுத்தப்படுவதை உறுதி செய்வேன் என டத்துக் ரமணன் ராமகிருஷ்ணன் உறுதியளித்தார்.
செய்தி: வீரா சின்னையன்
