தேதி : 13-12-2025
மாற்றுத் திறனாளிகளை அழைத்து வருடாந்திர வீர சூற முனீஸ்வரன் வழிபாடு நடத்திய டி.சி.பி. டத்தோ குமரன் & குடும்பம்
புகிட் அமான், பி.டி.ஆர்.எம்-இல் பணியாற்றும் டி.சி.பி. டத்தோ குமரன் மற்றும் அவரது குடும்பத்தினர், 13-12-2025 அன்று, சுங்கை புலோ, பண்டார் ஸ்ரீ கோல்ஃபீல்ட்ஸ், பிரிசின்ட் 2, எண் 9, ஜாலான் BSC 2A/6 என்ற முகவரியில், வருடாந்திர வீர சூற முனீஸ்வரன் ஆலய விழா (Vizha) மற்றும் சிறப்பு வழிபாட்டை பக்தியுடன் நடத்தினர்.
இந்த புனித நிகழ்விற்கு, Independent Living & Training Centre Malaysia (ILTC Malaysia) அமைப்பைச் சேர்ந்த 15 மாற்றுத் திறனாளி உறுப்பினர்கள் அன்புடன் அழைக்கப்பட்டனர். விழாவில் பங்கேற்ற அனைவருக்கும் ஆன்மீக அனுபவம் அளிக்கும் வகையில் சிறப்பு பூஜைகள் நடத்தப்பட்டதுடன், அன்போடு உணவு வழங்கப்பட்டு, அங்கப்பாவும் (Ang Pau) வழங்கப்பட்டது.
ILTC Malaysia அமைப்பின் சார்பில், அதன் தலைவர் திரு. ஜி. பிரான்சிஸ் சிவா அவர்கள், டத்தோ குமரன் மற்றும் அவரது குடும்பத்தினருக்கு இதயப்பூர்வமான நன்றியை தெரிவித்துக் கொண்டார். மாற்றுத் திறனாளிகளை மதித்து, சமூக அக்கறையுடன் இத்தகைய புனித நிகழ்வில் இணைத்துக் கொண்டமை அனைவரையும் நெகிழச் செய்ததாக அவர் கூறினார்.
மேலும், “இவ்விழாவை சிறப்பாக ஏற்பாடு செய்த டத்தோ குமரன் மற்றும் அவரது குடும்பத்தினருக்கு எல்லாம் வல்ல இறைவன் நல்ல ஆரோக்கியமும், வளமான வாழ்வும் அருள வேண்டுகிறோம்” என வாழ்த்துத் தெரிவித்தார்.
இந்த நிகழ்வு சமூக ஒற்றுமை, மனிதநேயம் மற்றும் ஆன்மீக மதிப்புகளை வலியுறுத்தும் ஒரு சிறந்த முன்னுதாரணமாக அமைந்தது..
